என்.எஸ்.சி போஸ் ரோட்டிலிருந்து பிராட்வேயில் நுழைந்தால் நூறு அடி தாண்டிய பிறகு வலதுபுறம் குணவந்தி பவன் என்னும் கட்டிடத்தில் அமைந்துள்ளது ஶ்ரீ குஜராத்தி மண்டல் என்னும் உணவகம். மிகமிக எளிய உணவகம். சேரில் உட்காரவே போதும் போதுமென்று ஆகிவிட்டது. ஒரு பெரிய தட்டில் குஜராத்தி தாளி எனப்படும் மீல்ஸ் (ஒரு ப்ளேட் 120₹) வைத்தனர். அதில் உருளை மசாலா, காய்கறி மசாலா, கட்டி தயிர், பப்பட், கத்தரி சேனை கூட்டு என பல. தமிழில் தான் எத்தனை சொற்கள் அவியல், கூட்டு, பொறியல், வருவல், உசிலி என. ஆனால் இங்கே எல்லாமே சப்ஜி தான்.
டேபிளில் நான்கு குவளைகளில் கோஸ் வெள்ளரி சேலட், பொரித்த பச்சை மிளகாய், புதினா சட்னி மற்றும் மாங்காய் ஊருகாய். இதன் பிறகு இரண்டு ரொட்டி, தோக்ளா மற்றும் புடலை அல்வா வைத்தனர். தோக்ளாவும் புடலை அல்வாவும் இனிப்புகள். அதுவும் அந்த அல்வா பச்சை கலரில் பார்க்கவே வித்தியாசமாக மிகுந்த தித்திப்பாகவும் இருந்தது. அதிக இனிப்பினால் ஒரு லெவலுக்கு மேல சாப்பிட முடியவில்லை. ரொட்டி மிருதுவாக அதுவும் கத்தரி கூட்டுடன் அருமையோ அருமை. மனசாட்சியே இல்லாமல் ரொட்டியை வைத்துகொண்டே இருந்தார்கள். நண்பனுக்கு எப்படி சொல்லி இதை நிறுத்தறதுனே தெரியலை. அப்புறம் எனக்கு தெரிஞ்ச ஹிந்தில "பஸ் பய்யா, சாவல் சாஹி"யேனு சொல்லி சாப்பாடு கேட்டேன்.
சாதத்திற்கு சாம்பார், ரசம் மற்றும் கெட்டி தயிர். சாம்பாரை உண்மையில் பருப்பு என்றே கூறவேண்டும். ஆனால் நன்றாகவே இருந்தது. ரசம் எதிர்பார்க்காத ஒன்று. செம சூடாக இருந்தது. கூட அந்த சுருண்ட பப்பட் மொறுமொறுவென அம்சம். கடைசியில் தயிரை அப்படியே சாப்பிட வேண்டியதாகிவிட்டது.
அப்படியே எழுந்திரிக்கலாமென பார்த்தால் கூட வந்த பயபுள்ள பாசுந்தியும் ஆம்ராஸ் என்ற மாம்பழரசமும் (ஒன்று 30₹) வாங்கிட்டான். பாசுந்தியை விட ஆம்ராஸ் செம திக்காக தெய்வீக லெவல். இங்கு சப்ஜி, ரோட்டி மற்றும் சாதம் மட்டும் அன்லிமிடட். ஏசி கிடையாது. வெயில் காலங்களில் கொஞ்சம் சிரமம். ஆனால் வட இந்திய சைவ உணவு விரும்பிகளுக்கு அருமையான விருந்து. குஜராத்தி ஸ்னாக்ஸ் மற்றும் ஸ்வீட்ஸும் இங்கு அமைந்திருக்கும் கடையில் கிடைக்கும்.
கூகிள் வரைபடம்:
No comments:
Post a Comment